نور النبوي: علشان تتدلع لازم تدلع.. ولما أحب واحدة هطبخلها

قال الفنان الشاب نور النبوي إنه يحاول أن يبحث عن الشيء الذي يحبه المحيطون به ويقوم بعمله.

وأوضح نور النبوي في لقائه مع برنامج Gossips المذاع على قناة اليوتيوب: "علشان تتدلع لازم تدلع، أحب أشوف كل واحد بيحب إيه وأعمله علشانه، أو أطبخ له حاجة حلوة بيحبها".

وأضاف الفنان الشاب: "أنا عاشق للطبخ، وخصوصا لو في حد بيحب أكلة معينة أعرف أطبخها، ولو مش عارف أتعلم وأطبخ لها". وأكد نور النبوي أنه غير مرتبط ولكن حينما يرتبط فإنه يحب أن يشارك حبيبته بعض الأمور التافهة.

وقال نجل النجم خالد النبوي: "أحب أروح الملاهي وبالذات لو فيها قطارات سريعة، وأحب أنشن وأهدي حبيبتي الدبدوب وغزل البنات، وكل الحاجات التافهة دي بحبها".

سر قلادة نور النبوي

ويرتدي الفنان نور النبوي قلادة في رقبته طوال الوقت، وكشف في أثناء لقائه مع Gossips قال: "أول مرة مثلت كان في مسلسل الاختيار في 25 فبراير 2021، روحت عملت السلسلة وكتبت عليها تاريخ 25 فبراير 2026".

وأوضح الفنان المصري: "كنت عايز السلسلة تفضل معايا، وأشوف بعد 5 سنين من شغلي هوصل لإيه، وهل السلسلة هتستمر معايا".

وتطرق الفنان نور النبوي لحديثه عن علاقاته بأصدقائه وقال: "أنا وأصحابي من زمان مش بنتخانق كتير، لكن لو في حاجة السبب إن مواعيدي في الشغل منضبطة جدا، وساعات ممكن أتأخر على أصحابي في الخروجات ساعتين وأكثر بسبب الشغل".

وقال إنه يحب أنواعا من الأغاني والموسيقى المختلفة وهو الأمر الذي يحدث خلاف بينه وبين أصدقائه قائلا: "البلاي ليست عندي مش نمطية، وفي حاجات مش مزيكا لما أشغلها لأصحابي ممكن تضايقهم".

وتابع: "ممكن أشغل لهم فيديوهات محفزة أو خُطبة، مثلا لو رايحين ماتش كورة أشغل لهم فيديو محفز، والفانز عندي على إنستجرام بيحبوا الفيديوهات دي".

آخر أخبار نور النبوي

أعلن نور النبوي تضامنه مع فلطسين وندد بالقصف المستمر على قطاع غزة، ونشر على حسابه الرسمي على موقع الإنستغرام: "اللي بيحصل لغزة وأطفالها صعب يتوصف، من قتل وجرحى وتهجير ولا إنسانية. بطالب بوقف إطلاق الرصاص بطالب وقف القصف. وبناشد الناس اللي قادرة إنها تتبرع عن طريق يونيسف. علشان نقدر نساعد غزة وأطفالها".

وعلى جانب آخر، فإن نور النبوي يستعد لطرح أول فيلم بطولة سينمائية له وهو فيلم "الحريفة"، وهو من إخراج رؤوف السيد ومن تأليف إياد صالح، ويضم الفيلم عددا من النجوم ومنهم نور إيهاب، وخالد الذهبي، وسليم الترك، ويظهر في الفيلم لأول مرة الكابتن أحمد حسام ميدو.

وتدور أحداث الفيلم حول شاب تضطره الظروف للمشاركة في مسابقة احتراف كرة قدم بقيمة مليون جنيه.