تامر حسني ينصح جمهوره بالحفاظ على الصلاة: أنا مش شيخ

فاجأ الفنان تامر حسني جمهوره بكتابة منشور كبير يحثهم فيه على الحفاظ على الصلاة، وسرد في المنشور عدة مواقف حدثت معه.

وكتب تامر حسني على صفحته الرسمية على موقع "الفيسبوك:"، :"أنت مش منافق أنت مجاهد بوست طويل بس اللي هيقراه للآخر يكون محتاجة جداً والله العظيم ..بخصوص الصلاة هحكي حاجة حصلت معايا  حبيت أشارككم بيها للي يهمه الأمر ".

وأوضح تامر حسني في المنشور: "في أكيد فيكم مش بيصلي أو بيقطع في الصلاة  اللي بيقطع في الصلاة  عايز أقول … افضل قاوم شيطانك لحد ما تنتصر. ده حصل معايا شخصياً  أواظب واقطع ميت مرة لحد ما استقريت مها اخد وقت ثوابك هيكون أكبر لأنك بتجاهد نفسك وشيطانك عشان خاطر ربنا".

 وتابع الفنان الشهير: "في نوع تاني اللي بيقول ((هبدأ من بكرا )) وميقدرش ويقول معلش بكرا  وًميقدرش تالت وميقدرش  عاشر أحب  أقوله حتى لو عزمت النية ١٠٠٠ مره ومش بتنفذ .. ربنا بيفضل مستنيك بمنتهى الحب لأنه شايف مجهود نيتك في الإصرار على الرغبة حتى لو مش قادر تنفذ هيجازيك خير برضو على  رغبتك حتى لو منفذتش لسه وهيبقى مستنيك تاخد القرار وفاتحلك أيده بكل حب عشان تنطلق وتدخل في رحمته وفي معيته في الوقت ده بيبقى حواليك ناس يا بيشجعوك ودول ناس تمسك فيهم".

وتابع تامر حسني: "يا ناس مش بتصلي ياريت تبعد عنهم هما  مش عايزينك تصلي غيره منك لأنهم من جواهم مقتنعين بربنا بس بيكابروا فبيزعلوا عشان متبقاش أعلى منهم عند ربنا حتى لو في شيء من الذنوب بتعملها عادي كلنا خطائين أوعى تخليهم يقولولك يا عم أنت بتعمل ذنب كذا وكذا ازاي تصلي يا منافق لا. وألف لا".

وأضاف الفنان الشهير: "مش منافق أنت مجاهد لنفسك ولشيطانك يعني في تحدي أكبر ثوابه أكبر بكتير عشان بقى خاطر ربنا غالي عندك وبتعمل اللي هو عايزه إنك تصلي وكل ما تغلط تروحله هو بيحب كده  وهيسامحك  عادي ،، ولو غلط وروحتله ١٠٠٠ مرة  المهم ان كل مرة يبقى عندك نية الارتقاء بنفسك معاه وتتصدق كتير صدقوني في قوة خارقة في تأثير الصدقة  وفي كل ذنب عليكم بالناس البسطاء  فرحوهم أوي".

وتابع: "ربنا هيفرحك أوي أوي أنا مش شيخ يا جماعة ومش بتكلم كفنان  لا أنا بتكلم كإنسان  أنا بقالي سنين يمكن من اكتر الناس اللي بتقرا في العالم في كل الاتجاهات انا فعلاً  بصحى من النوم بثقف نفسي وكل حرف بعرفه وكل معنى جميل أعرفه بحب اوصله ليكم دي إنسانيات عشان احنا كبشر أخوات لازم نقوي بعض ".

التفرقة في المعاملة

وأكد تامر حسني على ضرورة التفرقة في التعامل مع الله ومع البشر وقال: "المهم.. الناس لازم تفرق بين معاملة البشر للبشر ومعاملة ربنا للبشر ، يعني البشر لو مسألتش فيه يومين هو مش هيسأل فيك ١٠ وهيردهالك بس ربنا مش كده اوعوا تشوفوا ربنا بيعاملنا كده".

وأضاف: "ربنا يعني  الرحمة كلها  بالعكس بيفضل يناديلك كل يوم  ٥ مرات ولسنوات وانت مش بترد وبيقولك انا اكبر من اللي بتعمله تعالى اصلحلك روحك واشوف احتياجاتك واشفيك واريح قلبك وانت بتهمله ومش مره لا سنين كتير وكل يوم ٥ مرات ينادي بعظمته وجلاله وانت برضو مش بترد ونسمعه بيقول في الآذان الله اكبر يعني يا فلان مهما كنت بتعمل ايه ، انا اكبر واهم ..تعالى خد مصلحتك".

وتابع: " واعمل لروحك صيانه ومش ببلاش لا ده ربنا ساعتها بيكتبلك ملايين النجاحات والاموال والرحمات واسقاط الذنوب ويفديك ويشفيك وينور بصيرتك كفايه اسمك هيبقى مع الناس اللي مكرمهم  تحت معيته وحمايته".

وأضاف: "وانت برضو مش بتروح ومش مقدر النعمه دي  جرب تفهم وتحس ان لمًا نسمع آذان بيقول الله اكبر جرب انك تفهم المعني ان الله اكبر من اللي بتعمله دلوقتي حالاً وان ربنا مستنيك تطلب منه عشان يرضيك ويشيل ذنوبك ومهما كنت بتغلط وترجع تصلي عادي دا اصلاً لازم عشان تمسح الذنب اللي فات".

وأكد تامر حسني أن :"الصلاة والصدقة بيمحوا السيئة والصدقة بتطفئ غضب الرب يعني هتنضف وتمسح في مشوارك مع ربنا غلطه غلطه  وكمان هيبدلهم ليك حسنات في أحلى من كده بالذمة !!!؟؟؟".

وتابع: "وممكن في دعوة صادقة يمحوا ربنا كل ذنوب عمرك تخيلوا بقى … ده لو ميتنج مع مديرك وعارفين إنه هيهزئنا بنروح جري  طب تخيلوا مقابلة ربنا لدقايق بيرحمنا فيها ويسمع طلباتنا وعايزين ايه ويحقق لنا امنيات حلوه بمواعيده هو لعلمه المسبق بمصلحتنا وفي امنيات بتتحقق فوراً لانها لمصلحتنا في الفور  وكمان يشيل ذنوبنا ".

الله الرحمة

وتابع تامر حسني في رسالته للجمهور: "معقول نسيب الميتنج ده  هو احنا يعني عشان مش بنشوف النتيجه ساعتها !!! اطمنوا هو الحق والصدق ثقوا في كل كلمه وكل وعد وعد بيه … يا جماعة في الآخره ربنا  مش بس هيورينا اعمالنا  لا  هيورينا كمان هو شال من علينا ايه وفدانا بإيه هتعرفوا بقى قيمة الحمايه اللي ربنا كان عاملهالك بسبب صلاتك ورحمته هتبكي فرحاً من صدمة اللي هنشوفه".

وأضاف: "وعلى فكرة حتى اللي مش بيصلوا هما برضو  في رحمته وبيرزقهم أملا في ان يرجعوله ده هو اللي خالقهم وبرضو بيرحمهم لأنه رحيم بكل عباده بس اللي بيصلوا ويتصدقوا دول في معزة أخرى خالص وياما شوفنا ناس بتحارب الصلاة ودلوقتي بيصلوا وبقوا حاجة رائعة ناس بيشتغلوا ووسطيين عارفين يعيشوها صح بين الدنيا والآخرة".

واسترسل تامر حسني قائلا: "اوعوا تحسوا ان عشان في ناس في الزمن ده اتغيروا وبقوا بعيد أوي عن فكرة ربنا أصلا وممكن يتريقوا عليك لو صليت  او صومت .. ده الموضوع ده يخليك لازم تصلي اكتر من الاول عشان ثوابك بقى أكبر بكتييييييييييييييير لانك تحولت من مجاهد لنفسك لمدافع عن ربنا بتدافع عنه بقوه قدام ناس دانت كده كمان بقيت جندي من جنوده بتحارب عشانه".

وأضاف: "و يا بخت اللي ربنا بيستخدمه وكمان لو ربنا هداهم بسببك  شوف بقى هتقش حسنات قد ايه  يابن المحظوظه، هو دا صراع الدنيا هنآمن بربنا من غير ما نشوفه وهنعمل بالكنز اللي في القرآن اقسم بالله اقسم بالله اقسم بالله اللي عنده مصحف في بيته هو عنده الجنه ومش فاهمها عنده دليل واضح جواه اغلى من الكنز  خصص في اللايف ستايل عندك مهما كنت بتغلط عادي ربنا تواب".

وتابع تامر حسني: "وأفضل قلل من ذنوبك افضل قللها واحدة واحدة ده اسمه جهاد مع النفس يعني شيء عظيم ربنا شاهد على مجهودك فيه حتى لو روحت وجيت وروحت وجيت كل دي محاولات ربنا يحبك أكتر عشانها وهتكسب في الآخر إن شاء الله  ".

وأضاف :"ربنا وصلاته والصدقة وبر الوالدين . وشغلك . وأصحابك .اهتم بكل دول اليوم طويل ٢٤ ساعة عيشهم صح يا صاحبي  عادي والله في وقت ونص لكل دول".