تامر حسني يرد على رسالة محمد سامي المؤثرة:خلتني أدمع يا سمسم

حرص تامر حسني على توجيه الشكر للمخرج محمد سامي، بعد رسالته على صفحته الرسمية على إنستغرام الذي كشف فيها عن مساندته له خلال تصوير مسلسل "آدم".

رسالة تامر حسني للمخرج محمد سامي

وكتب تامر حسني تعليقا علي منشور محمد سامي قائلا: "يا سامي يا حبيبي يا بن الناس الطيبين شكراً من كل قلبي على كل حرف خارج من قلبك كتبته في حقي، خلتني أدمع يا سمسم، أولاً أنا صدقت موهبتك من وانت صغير سناً؛ لأنك فعلاً موهوب موهبة مش عادية وتاريخ نجاحاتك يشهد بكده".

وأضاف: "كنت عارف وانا بقدمك إني بقدم مكسب حقيقي للصناعة، ومن يوم ما سجلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنك أب مصدق في ابنه وعارف إن الناس مش هيدوله فرصة يطلع عشان سنه صغير، والحمد لله برحلتك ورحلتي أثبتنا للدنيا إنها مش بالسن لأ!!!".

وتابع تامر حسني قائلا: "بالمجهود والتعب والشطارة والمذاكرة وانت كل الصفات دي كانت فيك وانا لوحدي اللي عارف، عشان كده صممت إن الدنيا كلها تعرف معايا حجم موهبتك الحقيقي، حتى أعمالي اللي من إخراجك ليها مكانة خاصة في قلوب الناس مسلسل آدم، فيلم أهواك، فيلم تصبح على خير".

واختتم تامر حسني قائلا: "ولسه إن شاء الله نجاحات جايه مستنيانا مع بعض، ربنا يوفقك يا حبيبي في كل شغلك اللي جاي، وتكسر الدنيا وفي القمة زي عادتك، يا محمد شكراً تاني على البوست الصادق ده شكراً يا أصيل يا محترم، ربنا يخلينا دايماً لبعض ضهر وسند".

 

 

 

 

View this post on Instagram

 

 

 

 

 

 

 

 

 

 

 

A post shared by Mohamed Sami (@directormohamedsami)

رسالة محمد سامي إلى تامر حسني

وكان المخرج محمد سامي، فاجأ متابعيه على صفحاته بمواقع التواصل الاجتماعي، بمنشور طويل قام بتوجيه الشكر فيه للفنان تامر حسني، كاشفا عن تفاصيل تروى لأول مرة عن محاولته للإخراج أول مرة وكيفه ساعده نجم الجيل.

ونشر محمد سامي عبر حسابه على إنستغرام وفيس بوك، صورة قديمة تجمعه مع الفنان تامر حسني خلال تصوير مسلسل آدم، وعلق قائلا: "وَلَا تَنْسَوُا الْفَضْلَ بَيْنَكُمْ وأنا قاعد إمبارح في التصوير افتكرت الرحلة والشقي والتعب من أول عمل لحد العمل اللي بصورة دلوقتي، وافتكرت صعوبة الحصول علي فرصة عشان الواحد يثبت نفسه وحقق أحلامه".

وتابع قائلا: "فطبعا افتكرت أخويا وصاحبي الجدع الطيب الخلوق اللي دعمني من أول لحظة، وكان سبب في اللي أنا فيه دلوقتي، تامر قدم لي كل الدعم والحب والإمكانيات اللي خلتني أثبت نفسي وبالذات في وقت كان صعب الشباب يأخذ في الدرامة فرصة بحجم مسلسل آدم".

وأضاف محمد سامي قائلا: "فاكر إنه الكل كان رافضاً أني أخذ الفرصة دي ومستكبرينها عليا إلا هو وقف في ظهري كأنه بيحارب لإخوة وبصلي مرة والظروف كلها ضدي، وكنت حاسس وأنا بحضر أنهم هيجيبو حد غيري، وقال لي ده مسلسلك، وهتعمله وهتنجح و هتنجحنا معاك، حتى طريقته المتواضعة وهو بيقوللي مسلسلك كأني عامل تسعة مسلسلات قبله تحسس الواحد بنفسه وأهميته".

 واستكمل محمد سامي موجها رسالة لتامر حسني قائلا: "أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو محترم وعشان كده كلنا روحنا فيك، بحبك يا صاحبي، وتستاهل كل حاجة حلوة يا أجمل قلب، ويا رب يرزق كل الناس اللي يساعدهم على تحقيق أحلامهم زي ما رزقني بتامر حسني".