بشرى: أجور الفنانين مش حقيقية وأنا عليا أقساط وقروض

شاركت الفنانة بشرى في ندوة تكريمها من جريدة القاهرة 24، وفي الندوة كشفت عن أن الأجور التي تعلن على الإنترنت لبعض الفنانين ليست حقيقية وتستفز الجمهور، وأكدت أن معظم الفنانين عليهم أقساط وقروض عليهم دفعها.

وقالت بشرى: "هو فيه حد معلهوش أقساط دي شغلانة مش ورثة دي مهنتي مش بيت أبويا وأنا بشتغل وبعمل في هذا المكان".

وأضافت بشرى أن البعض يظن أنها تملك الكثير من الأموال لأنها منتجة، وهذا غير صحيحة، ولكنها أشارت إلى كونها "مستورة"، وقالت: "الناس فاكرة إنك علشان منتج يبقى أنت غني أو معاك فلوس كتير، ولكن الحمد لله هي مستورة ولكني زيي زي الشعب كله عليا أقساط وقروض، لأن ساعات بنقعد سنين كتير منشتغلش".

وقد نددت بشرى بالأرقام الفلكية لأجور الفنانين التي تنشر على منصات التواصل الاجتماعي وأكدت أنها غير صحيحة، وإنما يتم نشرها لاستفزاز الجمهور ليس أكثر.

وقالت: "فيه أرقام بتتقال عن أجور الفنانيين بتكون مش صحيحة، والفنان بيكون عايز يبين نفسه مطلوب وبيتخانقوا عليه المنتجين، وساعات المنتجين بيضربوا في بعض علشان يقولوا الفنان ده معايا أنا، ولكن ممكن اتنين تلاتة أجورهم عالية".

وأضافت: "ده كلام مستفز وبيستفز الجمهور والناس كادحة وبتشتغل وعايزة تربي ولادها وتدخلهم مدارس وبيشتغلوا شغلانة واتنين وتلاتة، ده الشعب وإحنا زي الشعب، هما اتنين وتلاتة فوق بس اللي بيجيبوا أرقام وبياخدوهم في الإعلانات".

وأكدت أن الكثير من نجوم الفن يعانوا من أزمات مادية بسبب عدم وجود فرص عمل مناسبة لهم، وقالت: "باقي أعضاء النقابة ناس بتعاني وكتير منهم قاعدين في البيت ومحبطين، وكتير من النجوم سنين شبابهم وعطائهم بتضيع علشان مفيش فرصة ومش لاقيين شغل".

وعن الأجر الذي تطلبه قبل العمل الفني أوضحت بشرى أنها لا تفكر في الأجر ولكنها تفكر في النص، وقالت: "أنا مش بشتري الأجر أنا بشتري العمل، الموضوع إيه وبشتغل مع من والشركة مين وهيقدملي إيه، والأجر بيكون على حسب الظروف".

بشرى ترد على انتقادات طارق الشناوي

وقد ردت الفنانة بشرى على انتقادات الناقد الفني طارق الشناوي لفيلم "أولاد حريم كريم"، وأوضحت أن الناقد طارق الشناوي لا يمدح أحدًا، ولكنها تفاجئت من ردة فعله، وتفاجئت كثر من رد فعل مصطفى قمر عليه.

وشددت بشرى على ضرورة أن يكون النقد الموجه للفيلم نقد مهني، فالنقد سمة أساسية في صناعة السينما ولا يجب أن يتحول إلى حرب كلامية وموضوع شخصي.

وقالت: "خلينا متفقين على إن النقد سمة أساسية من سمات صناعة السينما، وزي ما في بايع فيه شاري، والجمهور على راسنا أيا كان ولكن لما يكون جمهور حقيقي مش لجان إلكترونية".

وأضافت: "ونفس الشيء لما يكون الرأي مهني هيكون على راسنا لكن لو شخصي يبقى موضوع آخر، وأنا شايفة أن ده حوار شخصي الفيلم اتسحب ليه ومش قضية الفيلم".

يُذكر أن الفنانة بشرى تشارك في فيلم "أولاد حريم كريم" مع النجوم مصطفى قمر وبسمة وعلا غانم وغيرهم من النجوم والفيلم هو الجزء الثاني من فيلم "حريم كريم" الذي عرض قبل 18 عامًا.