إسعاد يونس عن زواج زوجها بشريهان: صدمت وشعرت بالغيرة

كشفت صاحبة السعادة الإعلامية والفنانة إسعاد يونس عن مشاعرها وموقفها عندما علمت بزواج صديقتها الفنانة شريهان من زوجها رجل الأعمال علاء الخواجة.

تصريحات إسعاد يونس مع أنس بوخش

وأكدت إسعاد يونس خلال حوارها مع الإعلامي الإماراتي أنس بوخش في برنامجه الذي يذاع عبر وسائل التواصل الاجتماعي، أنها شعرت مثل أي أنثى في البداية بالغيرة والغضب.

فقالت: "الأول صدمة شديدة بعدين مشاعر عادية بتاعة الغيرة والبكاء والانخراط في الحالة الدرامية بتاعة الموضوع ده، وبعدين كل بني آدم فينا موديل اللي يقبل ده ميقبلش ده خالص، أنا الموديل بتاعي قعدت أفكر هل أنا مثالية لهذه الدرجة، هل أنا أجمل الجميلات؟.. لأ طبعاً".

وتابعت قائلة: "هل الراجل ده مهم ليا أنا أحترمه واحترم طريقة تفكيره وكينونته بشكل عام، وأقدر أتخلى عن الحتة الصغيرة دي مقابل إني عندي كل الكنز ده، والسؤال اللي يجي في المرتبة الأولى "الأولاد" من أهم أنا ولا ابني؟".

إسعاد يونس: عيشت وانبسطت في زواجي

واستكملت إسعاد يونس كاشفة تفاصيل عن تجربتها الأولي في الزواج قبل زوجها الحالي علاء الخواجة، فقالت: "أنا مريت بالتجربة دي مع بنتي، طُلقنا أنا وأبوها وهي عندها سنتان، هنا بقى عندي بنت عانت من ده طول حياتها مش بسببي؛ لأن أنا حرصت جداً إني أملى كل الفجوات والأماكن الناقصة في العلاقة دي، ثم عندي ولد هيبقى عنده مشكلة.. مين الأهم أنا ولا ولادي؟ طب أنا عيشة، وانبسطت ولازلت مبسوطة".

وتابعت موضحة: "أنا فصلت علاقة الزواج تماماً؛ لأن هذا الرجل له أفضال عليا لا تنتهي ومواقف نبيلة لا تنتهي ليست كلها تحت شعار الزواج، بل تحت شعار النُبل، فأنت تقيم في الآخر إنت عندك ايه وقدامك مشكلة شكلها ايه والظروف هتبقى حاكمة في ايه، فأبتديت أهدى لأن الموضوع أكبر بكثير من أنه متجوز واحدة تانية، وزوجي نفسه أكبر بكثير من ده".

إسعاد يونس: شريهان قدرت موقفي

وعن شعور وعلاقتها بالفنانة شريهان، قالت إسعاد يونس: "بعدين الظروف جمعتني أنا وضرتي "شيريهان" ورغم إن هي وزوجي حبوا بعض ودخلوا في الحكاية بتاعتهم، إلا أنها شايلالي جوه قلبها قدر كبير من الاحترام وشايفاني نموذج قدامها، وبعدين كانت هتولد وتخلف فبقي فيه شراكة دم".

وأضافت للإعلامي أنس بوخش: "كل اللي بحكهولك ده لا يخص أي 2 ستات تانيين في العالم والمطلوب أن هذا الوضع يكون مسالماً، متحضراً، أهم حاجة فيه الأولاد، ومن أجلهم كل شيء يُستجاب".