ميدو عن عدم تشجيع الأهلي في كأس العالم: انتمائي للزمالك
حالة من آثارها الإعلامي واللاعب السابق لمنتخب مصر والزمالك، أحمد حسام ميدو، في الأيام الماضية بعد أن كشف في استديو تحليل مراسم قرعة كأس العالم للأندية 2025 بعدم تشجيعه النادي الأهلي المصري.
أحمد حسام ميدو: أنا ابن الزمالك
وتعرض أحمد حسام ميدو لحالة من الهجوم بين نشطاء مواقع التواصل الاجتماعي، ليحرص على توضيح وجهة نظره عبر منشور على حسابه الرسمي بمنصة إكس.
وقال ميدو: "أنا ابن الزمالك وأكبر فخر ليا في حياتي إني ابن المدرج ابن الثالثة يمين بلعب في الزمالك من وأنا عندي ٩ سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك بطاقتي وأنا عيل صغير هي كارنيه اتحاد الكورة اللي مكتوب عليه اسم الزمالك".
وتابع قائلا: "تتلمذت على إيد مدربين عظماء علموني إني أنتمي لفريقي بس، وما أشجعش أي ناد ثاني في مصر بالذات إلا نادي الزمالك، أي كان يلاعب مين، ولكن في نفس الوقت اتربيت إني أحترم كل المنافسين، وأهنيهم لو كسبوا وأباركلهم وأقولهم هارد لك لو خسروا.. هو ده معنى الروح الرياضية بالنسبة لي!!".
اعتذار أحمد حسام ميدو
وتطرق أحمد حسام ميدو إلى تصريحاته حول تشجيع النادي الأهلي في المونديال، قائلا: "لما اتسألت في الاستوديو هتشجع الأهلي في كأس العالم للأندية رديت بطبيعتي دون أي نفاق أو كذب؛ لأن بكل بساطة مفيش حاجة في الدنيا تستاهل إنك تكون كذاب ومنافقاً!".
وتابع قائلا: "اتفق معاكم إن التوقيت ما كانش مناسباً، وبعتذر لأي حد زعل إني قلت الكلام ده في حدث مهم يخص النادي الأهلي وأنا شايف الناس اللي زعلت بخصوص ان الوقت مش مناسب عندهم كل الحق.. أما لو اتسألت مليون مرة هتشجع اي نادي تاني في مصر غير الزمالك إجابتي هتكون هي هي عمرها ما تتغير لغاية لما أموت".
رد أحمد حسام ميدو على الهجوم
كما رد أحمد حسام ميدو على الهجوم الذي تعرض له على منصات التواصل الاجتماعي، قائلا: "أما بخصوص الهجوم اللي بتعرض له فأنا عاذر الناس؛ لأنهم ممكن يكونوا تعودوا على إجابات مختلفة في السنوات الأخيرة من ناس تصدروا المشهد في الإعلام وهما أكتر ناس بيأذوا المنافس في الخفاء، وأكتر ناس بتتمنى من قلبها خسارة المنافس من جواهم".
واستكمل قائلا: "مش هرد على اي حد هاجمني لان بكل بساطة أنا في مرحلة في حياتي شايف إن مفيش حاجة في الكورة تستاهل الخصومة والخناق بالعكس الكورة اتعملت علشان نتسلى بها ونستمتع بها ونناكف بعض شوية بس بالنسبة لي ماتتعداش أكتر من كده!!".
واختتم قائلا: "مرة ثانية بعتذر إني كنت سبباً في جدال قائم الأيام اللي فاتت للأسف مش ذنبي، ولكن بسبب مدمني الترند والدخلاء على كرة القدم اللي لا يمكن يفهموا أبدا عقلية مشجع الكورة!!".
انا ابن #الزمالك وأكبر فخر ليا في حياتي اني ابن المدرج ابن الثالثه يمين بلعب في الزمالك من وانا عندي ٩ سنين وانا عيل صغير كنت بروح ب فانلة الزمالك في المواصلات علشان الناس كلها تعرف اني ناشئ في الزمالك بطاقتي وانا عيل صغير هي كارنيه اتحاد الكورة اللي مكتوب عليه اسم الزمالك..…
— Mido (@midoahm) December 9, 2024