زيزو: لم أوقع للأهلي وانتظر الزمالك حتى الكونفدرالية
خرج نجم نادي الزمالك، أحمد سيد زيزو، عن صمته حيال الشائعات المتزايدة التي ربطته بالانتقال إلى صفوف الغريم التقليدي النادي الأهلي.
وجاء رد اللاعب القاطع عبر خاصية القصص المصورة على حسابه الرسمي في موقع "إنستغرام"، نافيًا بشكل قاطع توقيعه لأي نادٍ سواء داخل مصر أو خارجها.
زيزو: من يملك دليلًا على توقيعي؟
أكد زيزو على احترامه للجميع، لكنه أعرب عن أسفه لتزايد المعلومات المغلوطة والتزامه الصمت لفترة طويلة.
وكتب قائلًا: "الحمد لله أنا راجل بحترم كل الناس.. لكن للأسف عدم ردي على المعلومات المغلوطة والتزامي الصمت زاد عن حده.. كل ساعة خبر عن توقيع أو تجديد عقد زيزو".
وتحدى زيزو أي طرف يمتلك دليلًا على توقيعه لأي نادٍ بالكشف عنه للعلن، مؤكدًا: "وكل واحد بيغازل الشريحة اللي عايزها من الجمهور بكل وضوح أنا لم أوقع لأي ناد سواء داخل أو خارج مصر اللي حصل على توقيعي يتفضل يعلن".
وأضاف: "إذا كان كلامه صحيحاً؟ كمان اللي عنده دليل على توقيعي لأي ناد برضو يتفضل يطلعه على الملأ.. الناس لازم تعرف كويس، أنا بقدر جدا الكيان الكبير اللي أنا بلعب فيه.. ولا يمكن أنكر فضله عليا".
زيزو: فين حقوقي المشروعة؟
وفي لهجة عتاب واضحة، تساءل زيزو عن تجاهل الحديث عن حقوقه المشروعة وتأخر تجديد عقده، قائلًا: "لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في اتجاه واحد".
وأضاف: "ليه محدش أتكلم عن حقوقي المشروعة زي أي لاعب في الدنيا.. ليه محدش أتكلم إن الناس سابتني بقالها شهور طويلة ومش عايزين يجددوا عقدي.. ليه محدش أتكلم عن المستحقات المتأخرة اللي ليا بقالها كتير".
واستكمل زيزو: "ومش لاقي حد يجاوبني ليه محدش أتكلم أنه التجديد المرة دي جاي في مرحلة متقدمة من عمري بالنسبة للعيبة الكورة.. ولعيب الكورة مهما طول عمره قصير في الملعب".
وكشف نجم الزمالك عن تلقيه عروضًا مالية تفوق العرض المقدم له بعشرة أضعاف، مؤكدًا تمسكه بانتظار كلمة ناديه.
وكتب: "محدش كمان أتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده، قلت وهفضل أقول أنا منتظر كلمة النادي، ورد لاعتبارات كثير مش لتجميل الصورة".
زيزو: الجماهير لازم تعرف الحقيقة
وجه زيزو اتهامًا مبطنًا لإدارة ناديه بازدواجية الحديث معه ومع الإعلام، مشددًا على ضرورة رغبة الطرف الآخر في استمراره.
قائلًا: "والجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف الثاني يكون عايزني أكمل.. وتكون فيه استجابة الحاجة من المعروض عليا على الأقل".
وتابع: "لكن للأسف الكلام معايا حاجة.. واللي بيتقال للإعلام حاجة تانية.. أنا مينفعش اجرح في حد.. ولا أتكلم في حق حد.. لأن اللي بيتقال في الجلسات عيب يتقال بره.. على الأقل من ناحيتي".
وأضاف: "أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي، وأي كلام هيتقال غير كده في موضوع التجديد أو التوقيع قبل الموعد ده، هيكون كلام غير صحيح ورسالتي الودية جدا للمسؤولين في النادي اللي أنا بحترمهم جميعا".
واختتم زيزو رسالته بالتأكيد على رغبته في أن يكون الحوار حول تجديد عقده مباشرًا مع مسؤولي النادي بعيدًا عن التكهنات الإعلامية، معربًا عن أمله في تفهم موقفه.
وقال: "أتمنى الحوار في مسألة تجديد العقد يكون بيني وبينكم... مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على أننا نكمل الطريق شكرا على تفهمكم موقفي".