أمير طعيمة يشن هجوماً على إعلامي مصري بسبب محمد منير.. تعرف على التفاصيل
شن الشاعر الغنائى أمير طعيمة، هجوماً حاداً على الإعلامي المصري سعيد حساسين، بعد تصريحات حساسين عن الكينج محمد منير لإقامته حفل في ظل حالة الحداد التى تشهدها مصر على ضحايا الطائرة المنكوبة.
وكتب طعيمة، على صفحته الشخصية بموقع التواصل الاجتماعي "فيسبوك": "تعليقا علي فيديو الكائن ده بتاع الأعشاب: مقدمة ضرورية: أنا طبعًا مش مع الاحتفال بأي شئ اليومين دول، ورغم نزول أغنية "واحدة كاملة" لأنغام من كلماتي وهي أغنية مهمة بالنسبالي أجلت إني أشيرها علي حساباتي لمدة الـ٣ أيام الحداد وكنت أتمني إنها ما تنزلش أصلًا بس ده مش قراري.. ولكن:
1- إلغاء حفل قبل موعده بـ٢٤ ساعة مش بالسهولة اللي حضرتك بتحضر بيها أعشابك ودي بيوت مفتوحة وناس دافعة فلوس وفيلم أكبر من إن عقلك يستوعبه، وأنا مش شاكك إن منير نفسه كان يتمني يعمل كده و ما نفعش.
2- بحسبة الوزن النسبي لو حطينا محمد منير اللي هو الكينج غصب عنك في كفة وحطيناك في كفة.. كأننا بالظبط بنوزن حوت في مقابل نملة.. نملة مش عارفين طلعت لنا من أنهي خرابة وأيه مقوماتك عشان تبقي عضو مجلس شعب وتقدم برامج كمان.
3- ما تزايدش علي وطنية محمد منير، لآن محمد منير قدم لبلدك اللي لا إنت ولا ألف بتوع أعشاب زيك قدموه، محمد منير زرع فينا وفي أجيال كتير الذوق والإحساس والإنتماء للوطن من أيام ما كنت إنت "حساسين صغير"، وبتعمل بيبي علي روحك، محمد منير، إسم بنفخر بيه في كل مكان في العالم مش بس في الوطن العربي، ولو قلت لأي واحد في العالم "حساسين"، بيتريق علي محمد منير، هيقول لك يعني أيه حساسين، الأول وغالبًا مش هنلاقي رد.
4- إسمها بلاها "بالفتحة" مش بلاها "بالكسرة" يا مذيع يا جامد.. وإن كنت اتفق معاك أن الفيديو ده من أوله لآخره بلاهة فعلًا.
5- دي معلومة ممكن تضايقك أكتر: محمد منير، ما بياخدش١٠٠ ألف جنيه في الحفلة يا حساسين.. ده محمد منير يا إبني.
6- حفلات محمد منير، مش رقص وهلس زي ما عقلك الصغير متخيل.. الجمهور اللي بيروح لمنير، بيروح عشان يسمع شبابيك وشجر الليمون ومن أول لمسة وحدوتة مصرية وإتكلمي وعشرات من الأغاني اللي أقل أغنية فيهم أهم من اللي إنت ممكن تكون عملته وهتعمله في حياتك.
7- معلومة ناس كتير ما عرفوهاش: منير لما أخوه توفاه الله كان عنده حفلة بعدها بكام يوم وما لغهاش وكان بيغني وهو بيبكي، لآن الفن عند "منير"، حاجة تانية خالص ممكن اقعد سنين عشان افهمهالك ومش هتفهمها برضه، تفتكر منير، ما زعلش علي أخوه زي زعلك علي حادث الطائرة.
8- إنت ريحت منير واللي بيحبوه لأنك قلت إنك مبقتش بتحبه وبتحترمه.. أصل ما ينفعش جمهور منير، يتحط في خانة واحدة معاك يا حساسين، يعني لو رجعت تحب منير تاني قلنا عشان يا هو يعتزل يا احنا نبطل نسمعه.
9- لما تتكلم عن منير حتي لو فيه مبرر للنقد وهو إلي حد ما موجود من وجهة نظر البعض: "تتكلم بإحترام .. إنت بتكلم محمد منير، يا ولد"، "بصوت السادات".
10- مصر اللي مش عجباك عشان منير دي يا حساسين، منير من الحاجات الحلوة اللي فيها، الحاجات الحلوة قوي، ولما الأقزام عشان أكل العيش يضطروا يتكلموا عن العمالقة لازم يختاروا ألفاظهم.. يا حساسين.. بس هو فعلا يعني ايه حساسين يا حساسين؟.
ربنا يرحم ضحايا الطائرة ويتقبلهم شهداء ويرحمنا أحنا كأحياء بنضطر نتكعبل في اللي زيك يا حساحساحسا.. اتششش.. معلش الفلفل خلاني أعطس.. بقت ماشية بـ.... "أكمل مكان النقط".
فيديو ذات صلة
This browser does not support the video element.
وكان سعيد حساسين قد هاجم محمد منير من خلال برنامجه قائلاً: "أنا عايز أقولك اتقي الله في مصر تعمل حفلة وتلم الناس وتقعد تغني والبنات ترقص".
وتابع حساسين نقده لمنير قائلاً: "حتى لو أنت متعاقد على الحفلة دي من شهر ولا اتنين بلاها الحفلة، الناس في باريس وكل الدول عاملة حداد على الطائرة المصرية، واحنا اللي طيارتنا، اتقي الله، مجتش على حفلة تاخدلك فيها 100 ولا 200 ألف جنيه، راعي شعور أهالي الضحايا".
شاهد ماذا قال سعيد حساسين للفنان محمد منير في الفيديو أدناه: